मिति २०८२।०३।२३
इटहरी उपमहानगरपालिकाका प्रमुख हेमकर्ण पौडेलले स्थानीय पत्रकारितालाई बदनाम गर्ने कुत्सित मनसायले सामाजिक सञ्जालबाट व्यक्त धारणाप्रति नेपाल पत्रकार महासंघको ध्यानाकर्षण भएको छ ।
यही असार २० गते शुक्रबार बिहान नगर प्रमुखले ‘समाचार प्रकाशित हुने विषय सचिवालयमा अघिल्लो दिन नै जानकारी हुने र दानापानी नझरेपछि लाज छोप्न प्रकाशन/प्रसारण हुने’ भनी इटहरीको पत्रकारिता क्षेत्रलाई बदनाम र अपमानित हुनेगरी लेखेको महासंघ सुनसरी शाखाले जनाएको छ ।
समाचार या पत्रकारको व्यवहारप्रति गुनासो भए त्यसउपर विधि र पद्धतिअनुसार अघि बढ्नसकिने प्रचलित अभ्यास छ । त्यसलाई बेवास्ता गर्दै सार्वजनिक पदमा आसिन व्यक्तिले पदीय मर्यादाविपरीत अपनाइएको यो शैली प्रेसलाई कुण्ठित गर्ने र बदनाम गराउने मनसाय प्रेरित रहेको स्पष्ट छ ।
महासंघ प्रेसविरोधी यो हर्कतप्रति खेद व्यक्त गर्दै कडा आपत्ति प्रकट गर्दछ । र, कुनै पनि वहानामा पत्रकारलाई हतोत्साहित र बदनाम बनाउने यस्ता गतिविधि नदोहोर्याउन तथा संविधानले सुनिश्चित गरेको प्रेस स्वतन्त्रताको सधैँ सम्मान गर्न सम्बन्धित पक्षसँग जोडदार माग गर्दछ ।
रामप्रसाद दाहाल
महासचिव